Posts filed under 'રાજેન્દ્ર શુકલ'
અંતાખડી – રાજેન્દ્ર શુકલ, Rajendra Shukla
કાળ તો ક્યાં હોય છે, હોય છે બસ અબઘડી,
અધઘડી આળેખતાં ખૂટ ગઇ બારાખડી!
લ્હેર ઊઠી ભીતરે, ઊઠતાં સઘળે અડી,
અડતાંવેંત જ ઓગળી, ઓગળી અડવડ બડી !
એક એના વેણની ગાંઠ જે નિંગઠ પડી,
છોડતાં છૂટી નહીં, બંધ ગઇ નાડાછડી !
ખેડવ્યાં ખંભો દઇ, બારી ભેળાં બારણાં,
આગળા તડતડ તૂટ્યા, મિટ ગઇ સબ ગડબડી !
હું હસું ને એ હસે, એ હસે ને હું હસું,
અંત વિણ ચાલ્યા કરે, બેયની અંતાખડી !
ચેતવેલો શબ્દ છું, જ્યોત ઝળહળ જાગતી,
એમ હું આવું પ્રગટ જેવી જેની આખડી !
જ્યાં લગી છું, ત્યાં લગી છું, છવાયેલો જ છું,
ભીતરે પધરાવશો, એ પછી યે ચાખડી !
- રાજેન્દ્ર શુકલ
અંતરની વાણીમાંથી જ અભિવ્યક્તિ પામતી, ગુજરાતના મહાકવિની આ રચનામાં ગઝલની સુંદરતાની સાથે અશબ્દના શબ્દની વેધકતા પણ છે. આ ઘડીમાં જ જીવતાં, બધા કમાડોના આગળા તૂટી જાય અને પૂર્ણ પ્રકાશ પથરાઇ જાય તે ભાવ અહીં સમગ્રતયા છવાઇ ગયો છે.
Add comment January 22, 2007
શબ્દનું ઘર ઊઘડે – રાજેન્દ્ર શુકલ, Rajendra Shukla
ઘનઘોર ઘેરાયું સઘન આકાશ આખર ઊઘડે,
કૂંચી ફરે, તાળાં ખૂલે ને શબ્દનું ઘર ઊઘડે.
પ્હેલી પ્રથમ આંખો ફૂટી હો એમ અંતર ઊઘડે,
કમળ જ નહીં, આખું સ્વયં જાણે સરોવર ઊઘડે.
આ શ્વાસ ને ઉચ્છ્વાસ સાથે કોણ મંથર ઊઘડે,
કે જન્મ જન્માન્તર બધાં આ થર પછી થર ઊઘડે.
રેલાય કેવળ એકધારો સ્વર મધુર આરંભનો,
કોની પુરાતન ઝંખના, આ દ્વાર જાજર ઊઘડે.
ઊભો સમય થિર આંખમાં થંભી ગઇ સહુ પરકમા,
હું ઊઘડું ઉંબર ઉપર, સામે ચરાચર ઊઘડે.
- રાજેન્દ્ર શુકલ
1 comment January 8, 2007
અંધારું લ્યો – રાજેન્દ્ર શુકલ, Rajendra Shukla
ઊંટ ભરીને આવ્યું રે
અંધારું લ્યો.
આ પોઠ ભરીને આવ્યું રે
અંધારું લ્યો. — ઊંટ ભરીને …
કોઇ લિયે આંજવા આંખ,
કોઇ લિયે માંજવા ઝાંખ;
અમે તો ઉંબરમાં ઊતરાવ્યું રે.
અંધારું લ્યો.
અમે તો આંગણામાં ઓરાવ્યું રે
અંધારું લ્યો. — ઊંટ ભરીને …
એના અડ્યા આભને છોડ;
એવા અડ્યા આભને કોડ -
અમે તો મુઠ્ઠી ભરી મમળાવ્યું રે,
અંધારું લ્યો.
અમને ભોર થતાં લગ ભાવ્યું રે,
અંધારું લ્યો. — ઊંટ ભરીને …
- રાજેન્દ્ર શુકલ
આ વર્ષે સર્વશ્રેષ્ઠ ગણાયેલા આ ઋષિકવિને પોઠો ભરી ભરીને આવેલી જીવનની બધી મતા અંધારું જ લાગે છે. સવારનો પ્રકાશ ન થાય ત્યાં સુધી આ અંધારું બહુ પ્રિય લાગે છે. તે મમળાવવાના કોડ આભને અડી જાય છે.
પણ અંધારું એ અંધારું ! અજવાળું ન દેખાય ત્યાં સુધી જ તેની મહત્તા! અહીં આપણો પ્રયાસ અજવાળાને મમળાવવાનો છે.
1 comment January 4, 2007
તો કહું – રાજેન્દ્ર શુકલ
લો કરું કોશિશ ને ફાવે તો કહું,
શબ્દ જો એને સમાવે તો કહું! (more…)
2 comments September 25, 2006
હજો હાથ કરતાલ – રાજેન્દ્ર શુકલ
હજો હાથ કરતાલ ને ચિત્ત ચાનક;
તળેટી સમીપે હજો ક્યાંક થાનક. (more…)
Add comment September 8, 2006
યા નિશા સર્વ ભૂતાનાં – રાજેન્દ્ર શુકલ
ગામ શ્હેર સૂતાં છે રેશમી રજાઇમાં;
કોક બેઠા જાગે છે, લો! ગઝલ સરાઇમાં. (more…)
2 comments September 5, 2006
