મને શીખવ – કુન્દનિકા કાપડીયા

હે પ્રભુ,
સંજોગો વિકટ હોય ત્યારે
સુંદર રીતે કેમ જીવવું
તે મને શીખવ.

શોકના દિવસોમાં – કુન્દનિકા કાપડીયા

મારા આ શોકના દિવસોમાં
શાંતિ માટે, હું તારા સિવાય કોની પાસે જાઉં ?
મારા હૃદયની ઊંડામાં ઊંડી લાગણીઓને
તારા સિવાય બીજું કોણ ઓળખે છે?

થોડા..થોડા જ વધુ સારા થઇ એ તો?

દુનિયામાં દેખાતી નિષ્ઠુરતા,તે એક એક વ્યક્તિની એક એક નિષ્ઠુરતાનો જ સરવાળો જેને લઇ ને અમે તને દોષ દઇએ છીએ તે તો અમારો જ ગુનો છે.

અમે દુનિયાને બદલવાના પ્રયત્નો કરીએ સમૂળી ક્રાંતિના સિધ્ધાંતો રચીએ એને બદલે અમે દરેક જણ જો થોડાક જ વધુ સારા થઇએ, થોડાક ઓછા સ્વાર્થી થઇએ, બીજાઓનો થોડોક વધુ ખ્યાલ કરીએ
તે દુનિયાના રૂપરંગ બદલાઇ ન જાય,ભગવાન?

                                 નીલમ દોશી.
                                 (“પરમ સમીપે” માંથી સાભાર)

નિગૂઢ પ્રેમ – એની બેસન્ટ

અણુએ અણુમાં ધબકી રહેલ હે નિગૂઢ જીવન,
પ્રાણીમાત્રમાં ઝળકી રહેલ હે નિગૂઢ પ્રકાશ,
સર્વને, સચરાચરને એકતામાં આલિંગી રહેલ હે નિગૂઢ પ્રેમ,

જે કોઇ તારી સાથે એકરૂપતા અનુભવે, તેને -
બીજા સહુની સાથે પણ તે એકરૂપ જ છે,
તેનું જ્ઞાન થાઓ.

- એની બેસન્ટ

અનુવાદ – કુન્દનિકા કાપડીયા

પૂજા – રાબીયા

હે. પ્રભુ!
હું નરકના ડરથી તારી પૂજા કરતી હોઉં
તો તું મને એ નરકની આગમાં સળગાવી દે;
અને સ્વર્ગના લોભથી જો તારી સેવા કરતી હોઉં
તો એ સ્વર્ગનું દ્વાર મારે માટે બંધ કરી દે;

પણ જો હું તારી પ્રાપ્તિ માટે જ તારી ભક્તિ કરતી હોઉં
તો તું મને તારા અપાર સુંદર સ્વરૂપથી
વંચિત ન રાખીશ.

- રાબીયા

વિશુધ્ધ પ્રેમ – રામકૃષ્ણ પરમહંસ

આ રહ્યું તારું પૂણ્ય , આ રહ્યું તારું પાપ;
બન્ને લઇ લે અને મને કેવળ
તારા તરફનો વિશુધ્ધ પ્રેમ આપ.

આ રહ્યું તારું જ્ઞાન, આ રહ્યું તારું અજ્ઞાન;
બન્ને લઇ લે અને મને કેવળ
તારા તરફનો વિશુધ્ધ પ્રેમ આપ.

આ રહી તારી પવિત્રતા , અને આ રહી તારી અપવિત્રતા;
બન્ને લઇ લે અને મને કેવળ
તારા તરફનો વિશુધ્ધ પ્રેમ આપ.

આ રહ્યો તારો ધર્મ અને આ રહ્યો તારો અધર્મ;
બન્ને લઇ લે, મા!
અને મને કેવળ
તારા તરફનો વિશુધ્ધ પ્રેમ આપ.

- રામકૃષ્ણ પરમહંસ

અનુવાદ – કુન્દનિકા કાપડીયા

પરમ સમીપે – કુન્દનિકા કાપડીયા

       આમ તો રોજરોજ અમે તમારી પાસે કંઈકને કંઈક માગતા હોઈએ છીએ, પ્રભુ ! પણ આજે હું કશું માગવા નથી આવી. હું તો માત્ર, આ શાંત અંધારી રાતે, એકાંતમાં તમારી પાસે નિરાંતે બેસવા આવી છું. અને આમ બેસવામાં મને કેટલું ઊંડુ સુખ છે તે કહેવા આવી છું.

ભગવાન – કુંદનિકા કાપડીઆ

કેટલાક લોકો માને છે કે
ભગવાન જેવું કાંઇ છે જ નહીં
અને આ વિરાટ વિશ્વની રમણા
એક સ્વયંસ્ફૂર્ત સ્વયંસંચાલિત લીલા છે.

વિચાર કણિકા- 4 – કુંદનિકા કાપડીઆ

જગત મને જે કાંઇ આપે
તે કૃતજ્ઞભાવે ગ્રહણ કરીશ
અને સાંજ ઢળતાં મારી જાતને પૂછીશ!
આજે તેં કોઇને આનંદનો કણ આપ્યો છે કે નહિ? .

- કુંદનિકા કાપડીઆ

વિચાર કણિકા- 3 – કુંદનિકા કાપડીઆ

સુખના દિવસોમાં મારી પોતાની જ આસપાસ
સ્વાર્થની દીવાલ નહિ ચણું.
અને દુઃખના દિવસોમાં
વિશાળ હરિયાળાં મેદાનોને યાદ રાખીશ.

- કુંદનિકા કાપડીઆ