અપેક્ષાઓ દુઃખો સર્જે છે – શાહબુદ્દીન રાઠોડ

          ભગવાન બુધ્ધે કહ્યું છે :” અપેક્ષાઓ દુઃખો સર્જે છે.”
          મેં આ માત્ર વાંચ્યું જ નથી. જીવનમાં અનેક વાર અનુભવ્યું છે. માનવીની અપેક્ષાઓ જેટલી વધુ તેટલો તે વધારે દરિદ્ર.
            ભગવાન બુધ્ધ એક વાર એક મહાલયના પ્રવેશદ્વારે ભિક્ષા માટે ઊભા હતા. એ મહાલય કરોડપતિ શ્રેષ્ઠીનું હતું. શ્રેષ્ઠી બહાર જવા નીકળ્યા. તેમણે ભગવાન બુધ્ધને જોયા, પ્રતિભા જોઇ અને કહ્યું :” સન્યાસી! આપ કોણ છો એ હું નથી જાણતો, પરંતુ હું આપની પ્રતિભાથી એટલો પ્રભાવિત થયો છું, કે આપને વિનંતી કરું છું, કે મારી એક સ્વરૂપવાન કન્યા છે. આપ તેની સાથે લગ્ન કરી લ્યો. હું મારી આ સમ્પત્તિ તમને અર્પણ કરું છું. હું કરોડપતિ છું અને આપ ભિક્ષુક છો.”
              ભગવાન બુધ્ધે કહ્યું :” કદાચ જો એવું હોત.”  
              બુધ્ધનું કહેવું એવું હતું કે કદાચ જો એવું હોત હું વિચારત. પરંતું હું ભિક્ષુક નથી, તમે સમ્પત્તિવાન નથી.  જેની આંતર સમૃધ્ધિ વિશાળ છે. જેને અપેક્ષા નથી એ સમ્પત્તિવાન છે. અને જેનામાં આંતરસમૃધ્ધિ નથી , જેની અપેક્ષાઓ વધુમાં વધુ છે, તે ભિક્ષુક છે.

- શાહબુદ્દીન રાઠોડ